O informe presenta datos actualizados sobre a presenza das mulleres galegas no Hipersector TIC, en xeral, e no Sector TIC e Sector Contidos, en particular.
Os seus obxectivos son:
- Identificar as súas funcións e roles no cadro de persoal das empresas.
- Analizar o nivel de formación das mulleres galegas nas empresas TIC.
As fontes de información do informe son:
Enquisa sobre a Sociedade da Información nas empresas TIC galegas.
Afiliacións e contas de cotización proporcionados polo IGE ao OSIMGA, procedentes da Seguridade Social.
Os principais resultados do informe son:
No 2023, 9.529 mulleres ocuparon postos de traballo en empresas do Hipersector TIC galego, o que representa o 33,4% dos empregos.
No Sector Contidos, as mulleres contan cunha maior representación, 43,2%, o que reduce a fenda de xénero a 13,6 puntos porcentuais.
O Sector TIC rexistrou 7.098 mulleres afiliadas á Seguridade Social, o que supón o 31% dos traballadores/as do sector, no ano 2023.
O maior número de mulleres traballadoras no Sector TIC rexístrase en empresas dedicadas ás Actividades informáticas. Neste subsector empregáronse 4.742 traballadoras no ano 2023 (+8,1% respecto ao ano anterior).
No Sector Contidos o número de mulleres traballadoras acada no 2023 as 2.431, o que supón un incremento do 4,8% dende o 2022.
A evolución da presenza da muller no subsector contidos aumenta no último ano case un punto ata 43,2% tras permanecer moi estable arredor do 41,5% dende 2015.
A actividade onde as mulleres contan con maior presenza é “Edición de libros, e actividades relacionadas con cine, televisión e son” (42,7%).
O 29,6% dos homes e o 12,8% das mulleres que traballan no sector TIC en Galicia posúen algún tipo de Titulación Universitaria STEM, o que supón unha fenda de xénero de 16,8 puntos porcentuais, que supera os 12 puntos se falamos de FPs técnicos de grao superior.
En canto aos roles nas empresas, a muller segue a estar infrarrepresentada nos postos de liderado, pero sobre todo nos postos técnicos, os máis numerosos na empresa. O 54,1% do persoal son homes en tarefas técnicas, por só o 15,3% de mulleres técnicas.
