O OSIMGA achega os datos sobre a dispoñibilidade de páxina web e a presenza nas redes sociais das empresas TIC de Galicia no ano 2012.
Páxina web
Segundo recolle o estudo “A Sociedade da Información nas empresas TIC de Galicia”, o 68,5% das empresas TIC galegas dispoñen de páxina web, o que supón 5,5 puntos máis que no ano 2010 (63%). O 38,5% delas cumpre coas normas de accesibilidade, o que tamén supón un crecemento superior aos 5 puntos en relación ao ano 2010 (co 33%) .
O estudo recoñece que case 3 de cada 4 empresas TIC dedicadas a actividades comerciais ou informáticas dispón de páxina web, unha dispoñibilidade que se reduce ata valores inferiores ao promedio nas empresas de telecomunicacións, manufactureiras e doutros servizos.
Considerando o número de empregados/as, a totalidade de empresas TIC de máis de 10 asalariados/as dispón de páxina web, fronte ao 66,5% das que teñen menos de 10 persoas no equipo.
Aínda que o castelán segue a ser o idioma maioritario empregado nas páxinas web (o 97,7% no ano 2012), produciuse un importante incremento do galego e o inglés, de 14,3 e 18,6 puntos respectivamente.
Redes sociais
O 20,0% das empresas TIC galegas con acceso a internet está presente nas redes sociais. A finalidade principal de seu uso é para realizar accións de marketing, nun 68% dos casos, ou ben comunicarse e coñecer as opinións da clientela habitual (65,6%). O 7,6% das empresas que aínda non teñen presenza activa nas redes sociais ten previsto incorporarse a elas proximamente conscientes das súas vantaxes.
As empresas dedicadas a actividades comerciais son as que en maior medida fan uso das redes sociais (o 28,0%), mentres que as manufactureiras apenas teñen presenza nelas (o 4,0%).
Do mesmo xeito que acontece coas empresas usuarias de software libre, a presenza activa nas redes sociais é maior canto maior é tamén o número de empregados/as da entidade, acadando o 50,0% nas empresas con máis de 50 empregados/as.
Poden consultarse estes e outros datos na seguinte ligazón