Máis do 25% dos adultos europeos xogan regularmente a videoxogos

Data: 
28/04/2011

En concreto, segundo os datos obtidos nas enquisas  de ISFE realizadas en oito países de Europa, o 25,4% dos adultos xogan habitualmente, sendo un total de 79,2 millóns de xogadores. Esta porcentaxe varía desde o 38% en Francia até o 17% en Italia e Polonia. Ademais, hai que salientar o feito de que a porcentaxe aumenta entre os xogadores de entre 30 e 49 anos. O estudo conclúe que case o 30% dos xogadores desta idade xoga habitualmente.
No caso do Estado español a porcentaxe de adultos 'gamers' segundo o estudo ISFE é do 24%. Esta realidade reflectiuse tamén nas vendas no mercado español, como informaba o OSIMGA recentemente no balance económico da industria do videoxogo en 2010. O ano pasado o consumo total do mercado (hardware, software e periféricos) ascendeu aos 1.245 millóns de euros e o segmento de poboación adulta foi un dos principais consumidores.
Aínda que a maior penetración de xogadores en España é no tramo de idade de 7 a 34 anos -máis do 80% dos menores de 7 a 13 anos son xogadores e o 45,3% dos cidadáns españois de entre 7 e 34- , nas franxas de idade máis adulta os videoxogos xa se configuran entre as opcións preferidas de lecer. En concreto, da poboación de entre 35 a 44 anos, o 15,6% é xogador habitual e entre os 45 aos 54, o 7,8%.